I PORTALI

(di A. Moraca)

Ppe’ fare nu’ portale a nu’ palazzu

cce vodi petra bona de tagliare,

vo’ tutta guala, sulu de nu’ piezzu

si vo’ n’opera bona d’ammirare.

Se cumincia de sutta, di’ “piedritti”,

chiamati puru “spaddhe” ‘e l’architetti,

ccu’ dui o tri “conci” mu l’atizza è giusta

e pue fhai l’arcu supra ‘u chjanu ‘e ‘mposta.

Sempre ccu’ piezzi buoni e ccu’ gran gustu

cce fhai na’ curvatura a tuttu sestu,

pue ccu ra chjave ‘i chiudi e su’ sicuri

e supra pue po’ crisciare li muri.

Quannu ‘u lavuru gruossu è cumpretatu,

vo’, ccu’ motivi antichi, decoratu,

d’obbligu su’ ra cerza ccu’ l’alloru

chi su’ signi de grolia e bonaguru.

Certu a re case de li gran signuri

potianu essere fhatti sti’ lavuri…

A chiddhe de la gente ‘e bassa taglia,

troppu era già si cc’era na’ maniglia.